SEMANA DO LIBRO

 Do 22 ao 26 de abril celebramos a Semana do Libro con varias propostas conxuntas co Equipo de Biblioteca. A primeira delas invitábanos a realizar  A CARA DUN LIBRO, en inglés BOOKFACE. Tratouse de realizar unha fotografía na que unha persoa fai coincidir, mediante a ampliación ou redución da foto, a súa cara ou o seu corpo coa portada do libro. Mestres, mestras e familias puxémonos más á obra de o resultado foi o que vedes.

A segunda foi a participación nos APADRIÑAMENTOS LECTORES,  que xa vai pola sua II edición e coma no curso pasado consiste en que, nun anaquiño de tempo da nosa xornada escolar, os maiores do cole escollen a un pequeno ou pequena para lerlle un contiño. Mirade que contentos estabamos todos.

E ata algunha é quen de ler soiña...

SEMENTEIRA DE VERSOS

 

O alumnado de 6º, xunto coa suas mestras, foron os encargados de representar ao noso cole na Sementeira de Versos que este ano convocou o Concello de Pontedeume aproveitando a Semana da Poesía.

Noraboa! polo voso traballo co recitado de versos, a cantiga e esas fermosas flores que encheron de cor e ledicia os xardíns do paseo marítimo da nosa vila.

DÍA DA POESÍA

 O día 21 de marzo celébrase mundialmente o Día da Poesía. Aproveitando a celebración do aniversario de Rosalía de Castro o pasado 23 de febreiro e seguindo a proposta de Güino, todo o alumnado do centro reunímonos no patio de primaria para recitar os versos traballados nas aulas.

Amosamos aquí os versos recitados e que penduramos no noso taboleiro especial Rosalía, a nosa poetisa. Sentimos non poder amosar o audio recitado dos mesmos pero o espacio escollido para a actividade, ao aire libre, e os medios tecnolóxicos non permitiron unha boa calidade de son para gozalo.

DÍA DE ROSALÍA

Para a conmemoración do aniversario da nosa poetisa galega de cabeceira, o 23 de febreiro, contamos coa colaboración das aulas de 5 anos que prestaron a súa voz ao vídeo co que, colaborando os equipos de biblioteca e dinamización, animounos a traballar os versos de Rosalía de Castro contidos no audio libro "Rosalía Pequeniña". 

O día comezou co agasallo dunha rosa en cada aula que, no seu talo presentaba unha folliña coa dirección web á entrada do video na páxina do blog da nosa biblioteca Xardín do Pasatempo. 

Desde alí Güino convidounos a traballar poemas de Rosalía de Castro que o vindeiro 21 de marzo recitaremos na celebración do Día da Poesía.

Como mostra gráfica deste día o alumnado devolveu a rosa ao Xardín de Rosalía construído para a ocasión e que amosou na entrada do centro a biografía e unha mostra bibliográfica da nosa escritora.

ENTROIDO OLÍMPICO!!

 Este curso e con motivo do PDI AS OLIMPÍADAS o entroido do Couceiro non podía ter outro tema que os xogos olímpicos e, aquí nos tedes a todo o alumnado e profesorado implicado nos preparativos para facervos gozar dun intre ben divertido.

Desde fachos olímpicos, hasta gregos e gregas danzando, aros que invitan a asistir a París e a lembranza de tantos e tantos logos que se deseñaron desde hai moitos anos para celebrar esta festa do deporte. Non faltou nada nesta xornada festiva. 

Tampouco desde aquí queremos deixar de agradecer a colaboración das familias, nos talleres, no aporte de materiais e en todo o que fixo posible que un ano máis abrísemos o entroido na nosa vila, aínda que a choiva non nos permitise realizar o tradicional pasarrúas.

Gozade destes vídeos!! 

E como remate o.... XA MORREU!

ATA O VINDEIRO CURSO ENTROIDO!!

DÍA DA PAZ

Foron dúas as principais actividades do noso cole para celebrar o Día da Paz. 

Coas MINI OLIMPÍADAS POLA PAZ buscouse a colaboración grupal para realizar unha serie de probas que prepararon os profes de educación física, Roberto e Xabi. Coa decoración individual de Bolboretas para formar os SÍMBOLOS DA PAZ COS AROS OLÍMPICOS representativos dos cinco continentes decoramos os ventanais principais do centro.

Ámbalas dúas actividades ensináronnos a importancia da colaboración para un fin común e como, poñendo cada un de nós as nosas potencialidades, podemos CONSTRUÍR entre todos.

Aquí temos unha mostra deste día vivido polas aulas de Educación Infantil.